Pitaruah Ayah untuak Anak Laki-laki Volume 1 (Pre Wedding)

Saya masih ingat masa-masa waktu sekolah dulu, ketika video hasn’t killed the radio star, ketika radio masih jadi favorit penghibur masyarakat, ketika sinetron belum jadi santap malam para keluarga. Di Bukitinggi ada sebuah radio (saya lupa namanya), setiap jumat malam selalu menyiarkan acara yang diproduksi oleh Balerong Group Jakarta, pimpinan Yus Dt. Parpatiah, berupa sandiwara minang bertema sosial dengan genre sitcom ataupun drama, kadang diselingi dengan acara penyampaian Pesan-pesan yang dibawakan langsuang oleh Ayah Yus Dt. Parpatiah. Yang paling saya suka adalah sitcom yang lakon utamanya adalah Tambaro. Saat ini saya lagi sibuk nanya-nanya ke Mbah Google, apa dia pernah kenal dengan Tambaro tsb.Tapi saya tidak akan membahas masalah Sitkom tsb di postingan kali ini.

Beberapa waktu lalu saya mendapat sebuah rekaman petuah atau pesan yang dulunya pernah saya dengarkan di radio itu. Tiba-tiba muncul keinginan untuk mengubah pesan suara tersebut jadi pesan tertulis (disadur sepenuhnya tanpa diedit sama sekali). Tapi ada kendala yang saya hadapi, beberapa kata yang Ayah Yus Dt. Parpatiah gunakan baru pertama kali saya dengarkan. Kemungkinan ada kesalahan dalam penulisan, saya minta maaf.

Rencana postingan dengan kategori Pitaruah Ayah ini akan dibuat berseri. Volume 1 seri ini adalah Piitaruah Ayah untuak Anak Laki-laki (Pre wedding), dan insyaallah akan menyusul Volume berikutnya.

Inilah posting pertama, Piitaruah Ayah untuak Anak Laki-laki Volume 1(Pre wedding) , selamat membaca, semoga bermanfaat.

    السَّلاَمُ عَلَيْكُمْ وَرَحْمَةُ اللهِ وَبَرَكَاتُهُ


O, nak kanduang badan dek ayah, tunggak pananai rumah gadang, pasak jo kunkuang di nagari, dangakan malah elok-elok nak:

    Dibali tali nan sayuik panyambuang bangkalai lamo
    Sungai batang bakampuang guguak
    Disinan taratak dahulunyo
    Batanang-tanang anak duduak
    Ayah ma ansua jo bicaro
    Elok-eloklah buyuang kaparak
    Tutuah lah dahan kayu jua
    Ambiak kahulu tangkai ladiang
    Elok-elok buyuang manyimak
    Kok lai tasabuik dinan bana
    Ambiak ka guno ka pambandiang
    Nyampang nan bukan nan tabaco
    Ulah dek binguang badan juo
    Tinggakan jadi sarok laman
    Ka Tuhan tobat ayah

Dulu lah ayah sabuik juo, baraso mangko manusia dijadikan untuak pamimpin di alam ko, khalifatulllah jabatannyo, wakia tuhan di muko bumi. Kamudian nan dari pado itu, kapado kito laki-laki dibari pulo tugas khusus sebagai pemimpin perempuan. “laki-laki itu pemimpin bagi para wanita” baitu bunyi surek Annisa ayat ka 34. Di ayat lain Allah firmankan “peliharalah dirimu dan ahlimu dari api neraka”. Siapo nan ahli manuruik syara? Partamu Istri, kaduo anak, katigo nan di bawah perwalian. Merekalah nan ka disalamaikan laia batin dunia akhirat. Mako dek sabab karano itu nak, sebagai anak laki-laki nan dimaso katiko nanti, lamo lambek katibo juo, waang kajadi urang gadang, mamikua baban tanggung jawab pamimpin di rumah tango, bukan mudah jadi gubalo nak sajak parintah nan sabuah taruih larangan nan sapatah, caro mauruih anak bini, lai koh taracak dalam bana, manyimpang dari hukum, tantangan nafakah nan babarikan, nasi sarimah nan basuok, aia satitiak nan bataguak, pitih sakupang kabalanjo, kain sabanang nan bapakai. Laikoh di jalan Allah atau bacampua barang haram? Sadonyo kaditanyo nak, sadonyo ka disudi ka disiasek dipareso di meja hijau di hadapan Kadhi Rabbul Jalil. “Setiap kamu pemimpin dan setiap pemimpin akan ditanya tentang kepemimpinannya” baitu Rasulullah baparingek.

Mako jan padolah nanti payah bana nak, Upah tajawek kabau pincang, Dihalau bahabih hari, Utang lah nyato batungguan. Kini-kini ayah kanakan hati hati mancari jodoh Jan basuo bak kato urang:

    Babaju kasungguah lusuah
    Bakatak-katak di langan
    Lah buliah mangkonyo rusuah
    Mandapek raso kahilangan

Tansano mamiliah kayu ka bajak mako carilah nan lantiak landai, nan bungkuak agak malaua, jan rumik bana manarah nyo. Piliah dagiangnyo nan bapilin, ba matan bamato-mato batareh baurek-urek. Mukasuiknyo kok tasorong bajak ka batu sah maliuak mato singka kabau nan indak payah amek. Satantang mamiliah parampuan ado anam nan ka dipandang, manolah wajah nan anam:

  1. Rancak ruponyo
  2. Mulie bansonyo
  3. Banyak haratonyo
  4. Tinggi sikolanyo
  5. Haluih budinyo
  6. Taat agamonyo

Carilah sabalik kampuang Yuang, pareso bilang nagari bak mamiliah baniah katampang. Nan rupo elok, rauik nyo rancak, kok kuniang putiah barasiah, kok itam manih manjalinok, gadang nan indak gadang bana gapuak tangguang kuruih tak jadi. Langkahnyo tagonyek-gonyek, lenggoknyo cando baukua, caliak taduah pandang mandanyuik, pado galak sengeang balabiah, indak basikek manih juo. 😀

Sudah itu nan banso tinggi badarah biru, anak rajo turun tamirun, anak puti sunduik basunduik ibu dosen bapak pejabat, mamak cadiak urang tapandang, minantu lareh dahulunyo.

Piliah lah pulo nan kayo banyak harato, sawah bajanjang turun bukik parak laweh tumpak batumpak, bantiang jo kabau tak tabilang. Rumah mewah oto balirik tokonyo sabalik pasa, tiok bank badeposito jo remot mambukak lacih.

Satantang sikolanyo urang tadidik tapalajar S1 di bidang hukum, pasca sarjana ekonomi, Doktoranda bagayuik pulo, kini MA nan di anggannyo. Bahaso Inggirih bak aia tajun, Bahaso Jerman indak bahangok, kononlah Japang jo Mandarin.

Alun sampai disinan sajo yuang, nan baradat budi haluih tutua lunak kato marandah gayanyo anggun kaibuan, lincah, supel, basopan santun, tapakai tata krama kode jo etik pergaulan sahinggo madok ka bawah tak manakua, di ateh patang kalinduangan kayo musikin tak basisiah.

Pangabisan Nak, gadih muslimah pakai jilbab iman taguah amalan taat, juara umum MTQ, panguruih remaja masjid, pandai dakwah baceramah.

Itu kok kandak buliah pintak balaku tu Buyuang, tapi manurik pandapek ayah, raso tak mungkin ka batamu sarik buliah larang basuo antah di dalam kato-kato. Kadang-kadang iyolah dapek nan di hati tapi tak dapek bakandak hati , nan bak ibarat pantun urang:

    Patah silaro junjuang siriah
    Maraok ka rumpun bambu
    Daun nan duo tigo alai
    Digatia anak dari baso
    Satokoh kain dipiliah
    Alah dapek nan katuju
    Banang haluih corak kanai
    Sayang baginjai kapalonyo

Kok tak basuo nan sado nan tun, di antaro nan anam nan ka dicaliak usah tatumpu ka nan ampek tapi utamokan nan duo macam yaitu budi jo agamo, sabab akibaiknyo Nak, rancak rupo indak baiman itu pangka cilako dalam kampuang manggata dalam nagari. Mulie banso babudi indak, congkak takabua tanatanganyo manjajok di masyarakat, urang kayo jauh jo agamo tumbuah lah tamak jo sarakah jo pitih urang diagonyo. Ilmu tinggi akhlaknyo kurang, alamaik cadiak nak manjua, Negara digadaikannyo. Sabaliaknyo nak, rupo kurang, tampan manangah awak bansaik sikola tangguang, urang darai banso di,bawah, lah yatim piatu pulo :cry:, tapinyo babudi, elok bahaso, iman taguah, ibadat taat itulah urang jadi pilihan. Sasuai jo hadits nabi “hendaklah kamu memilih istri yang baik agama dan akhlaknya, kalaulah tidak demikian niscaya kamu akan kecewa”, hadits sahiah riwayat Ahmad.

Sudah pun rundiang nan bak kian, ayah saran ayah anjurkan ambiak lah nan sadang elok, di tangah latak tulang pungguang, sabab nan malabiahi ancak-ancak, mangurangi sio-sio, sapanjang tubuah ayam-ayam. Yang sedang-sedang saja, baitu syair lagu dangdut. Kok mato kan yo condoang ka nan rancak nak, salero tunggang ka nan lamak, itu wajar sajo, itu manusiawi, mako carilah nan elok rupo manih dipandang ubek jariah palarai payah, paminang mato batang padi. Tapi yo sah nan rancak jan mangamek nak, bintang kampus bungo nagari idola anak mudo-mudo, JANGAN!. Isuak diiriang jo seso Nak, picayolah ka ayah. Apo sabab? Dek awak manaruah balam mau, tantu sabalik buruang maangguak tiok lalu tiok mamatiak, urang singgah manjujai juo, dima katahan sangkak pimpiang yuang, raso kalapeh dari tanggan. Ibo ayah nasibang baiko nak tarumuak bak kalah main makan hati barulam jantuang gilo bamato ka bulakang.

Satantang asa katurunan, caliaklah urang baiak-baiak, kaji kalampih nan di ateh, kok lai barasiah di hulunyo, lai barasiah kamuaro. Bapak balang anak mingkuriak tibo di cucu rintiak juo. Maliek ranji katurunan itu paralu nak, PARALU. Namo nan dipandang usah bansonyo. Bukan tu darah rajo-rajo turunan lareh angku damang, indak paralu. Sabab baitu kato ayah dek awak urang biaso, ayah takuik ayah kuatir, waang dipandang remeh urang. Bak pantun-pantun urang pagurau koeh:

    Basimpang jalan di Tembok
    Batumbuak di Pintu Kabun
    Ka kida kakampuang Cino
    Urang siriah awak karakok, yuaaang
    Lai bana saroman daun
    Diraso balain juo

😯

Kok dapek mamiliah jodoh nak, usah nan kayo rayo bana, tapi satingkek beda salisiah di ateh awak sabanang. Kok lai bagian samo bansaik bajaso tiok baragiah , tau basyukur jo nan ado. Walau titoron ang balikan labiah bak linan nan diurang. Tapi jo nan kayo kumari bedo diseokan rumah sapetak, elok lah gudang rang gaeknyo. Dipadiaan nyo mangontrak, kunun pulo mambali rumah, awak lah nyato urang manumpang raso tajajah lahia batin. Taroklah bini lai saulah, tapi dima batandan ka mintuo, basobok samo pambayan awak lah kulai kucuik dulu, malangkah tauntok2 magicek bak pita kusuik, indak kanaik panji-panji ang yuang. Dibae pulo manjauah manyisiah dari nan banyak, disinan mangko tambah parah, tajarak silaturrahmi, kasihan jo anak-anak, inyolah korban kesenjangan, kesimpulannyo nak,

    Si maya gadih rang Bayua
    Bintang SMA Panyinggahan
    Bamiang lalok di kasua
    Sanang di lapiak panjamuran

Satantang jo pendidikan, yo handaknyo rang sikola, gadih tadidik tapalajar, sabab di maso-maso bak kini, kalau lah hanyo tamaik SD, konon tak pandai tulih baco alamaik kasampik alam dek nyo, cangguang didalam pergaulan, kok dapek pintak jo pinto, sambah hamba ujuang tabu, marasai duduak di SMA handaknyo, kok alah sabantuak itu mudah-mudahan manangkok parabolanyo indak kabinnguang memble bana. Sungguah pun baitu nak, ado ciek nan ka dingek, yaitu jaan tinggi sikolanyo dari awak, handaknyo satingkek di bawah awak, atau setaraf sakadudukan, nyampang tapaso tinggi juo, usah manyolok jauh bana, sabab kalau tinggi nan di pimpin dari nan mamimpin dima wibawa dilatakan. Nan bak bilah panggiriak basi, baa bana kuat mangisa, nan bilah katingga bilah juo, tuah taimpik sajak dulunyo. Caliaklah ayam baranak itiak, sajak talua lah diarami tibo wakutu ditatehkan, bakaja mambaok turun , diaja mancotok-cotok, sasampai ditapi tabek, anak itiak tajun ka aia, baranang ilia jo mudiak, ibo awak nasib induak ayam nak, mamangia bakotek-kotek balari sabalik kolam, itiak nan indak acuah lai.

Ujuang kato buhua rundiangan, adopun mamiliah parampuan nan memenuhi rukun jo syarat untuak jadi pasangaan hiduik, mustilah mamandang unsur nan anam, yaitu: unsur kecantikan, unsur keturunan, pendidikan,ekonomi, moral dan agama. Kok indak panuah ka ateh, panuah kabawah jadi juo. Asal jan sirah nilai rapornyo. Misalnyo, indak usah nan rancak bahenol bana sabantuak artis peragawati, usah pulo nan penceh basagi-basagi :???:. Dimahlah sayang disangkuikan?

Ooo, soal keturunan dak baa doh urang biaso kebanyakan nan paralu bapaknyo bukan pamaliang, mandehpun bukan perek, indak pulo asa palasik. kok ka bansaik, bansaik malah, tapi usah nan bansaik banyak utang, sahinggo baru sapakan bini urang, urang lah antri nan managiah, IJAN TU.

Kok pendidikan pulo, minimal tamaik SMP, satingkek jo Tsanawiyah, cukuiklah itu. Sudah tu akhlak, iko mutlak paralu ko, carilah gadih sopan urang saulah, nan tau baramah tamah, nan paragiah pamurah nan paibo pasidakah nan panyantun ka urang susah tapi iklas karena Alllah. Baa pulo jo agamonyo? Bialah dak siak bana, Cuman nan limo wakatu indak tingga puasa ibadah wajib, nan sunat banyak saketek tatap takarajokan. Istimewa nan ciek ko nak, rancak labiah bini dari awak, supayo apo? Supayo takalok ado nan manjagokan kok lupo ado ka maingekkan.

Sahubungan jo masalah nan ko nak, ado rumus diagiah Nabi, kiro-kiro kato baliau dan bahaso caro di awak ampek kriteria ciri-ciri istri teladan, ma nan ampek, yaitu:

  1. Apobilo dipandang hati awak sanang
  2. apobilo disuruah nyo capek pai
  3. apobilo dibari gadang atinyo
  4. apobilo tapisah elok laku.

😛 😛 😛
Itu, sabaliaknyo tando tando istri cilaako,

  1. panampilan bantuak cimutu, samak-samak mato mamandang. Badan kumuah rambuik kusao, kok kain dak sandereh, muko masam suko pambudaik, katiak bak baun patuih.
  2. Kalau disuruah inyo pambantah, asah dilarang dilangganyo, diajai bantuak rangcadiak, namuah batangka bakaruak arang, badebat batagang marieh, ciek di awak saribu dinyo.
  3. Kandaknyo barapi-api mamintak tiok sanyenyek tak peduli dimuko urang, tapi dibalikan nan murah masak cacek, diagiah nan maha tak nyo rajan. Nan gadang indak badaso, nan panjang dicumeehkan, wak talengah disembanyo.
  4. Panguntiang dalam lipatan, pamanciang dalam balaango panghiatan sahiahnyo bana. Diadokan cando saulah, bapura-pura setia, mesranyo allahurabbi, tibo dibaliak pambulakangan kasiah pindah sayang bapaliang, biliak ditunggui urang lain 😈 😈 :twisted:. Nan bak pantun Nadi Suwaiyan:
    Basa udin anak rang Kamang
    Belok ka Batam pulang pai
    Di Pasa Banto pamainan
    Apo katenggang induak samaang
    Disangko oto digarasi
    Kironyo urang manambangkan

Nak, itulah bunyi pitaruah ayah nak, tantang mamiliah parampuan untuak ka diambiak jadi istri. Nyampang kok tumbuah pertanyaan, baa caro manyalidikinyo, jawabnyo mudah sajo, masalah rupo jo rauik badan, bisalah dipandang lansuang, sawajah asa katurunan, kondisi ekonomi latar belakang pendidikan buliah batanyo informasi, batanyo kian kamari, basiasek bakeh kawannyo, tapi soal pribadi pambaoan, ataupun amal jo ibadah, bayangnyo nampak diparangai caliak korenah tingkah laku, sinan ka sahiah gambarannyo. Kok baitu malah surah ayah, tantu kalian bapandapek, supayo siang nan bak ari, supayo tarang nan bak bulan nak nyato itam putiahnyo, tantu “pajatu” digauli bana, dibaok bakawan arek, dipacar bacewek-cewek, barulah dapek dipahami. Kok hampo bia nak tabang, boneh dinaikan ka rangkiang hati nan tak ragu lai. Sabananyo nak soal pacar mamacar ko, bapomle istilah lamo, bagandak caro saisuak di hati ketek kami rang tuo, samiang haram dak katuju, malah cilako tanatangannyo. Sabab apo? Sabab diliek contoh ka nan sudah nak, kalau api jo bensin lah barampia, nan katidak nyalo tabaka sulik lah bana manjagonyo, ntah dibateh jo ruang kaco. Tansano lah iduik mangajolak yuang, rumah nyalo kampuang tapanggang, kalam nagari di asoknyo jangguik ayah ang dilalahnyo. Tapi samantangpun baitu karano dek anak mudo kini, batin maaja indak paarih radar lamah amper bakarek tak paham kieh jo kurenah. kok itu namonyo to the point, tembak tupai mancokok mariah, silahkan bacewek bapacaran apo boleh buat, tapi awas jago jarak ingek jo diri, martabat dipaliharo anak urang disalamaikan, kok wakuncar kecek kalian, wajib kunjung pacar kapanjangannyo atau pai apel di malam minggu, musti tau aturan lalu lintas mangarati jo rambu2 jan sampai awak kanai tilang. Eloki urang sarumah, sayangi adiak-adiaknyo muliakan urang gaeknyo baso-basoi dunsanaknyo. Kecek urang kan alah, tandonyo arok jo tinaman, siang ditarangi dirusuakyo, pataguah paga sakuliliang jan lupo jo pupuak kadang. Jiko maota, basantai-santai, baolah duduak di barando, mangecek maagak-agak, galak usah marahai-rahai, pulang malam jan laruik bana. Nyampang ingin kalua rumah bajalan-jalan, rekreasi mesti saizin bapak jo mandehnyo batantu kama tujuan, sate sabungkuih tu wajib tu 😉 :grin:. Pendeknyo, mukasuik maajuak urang, awakpun takanai ajuak. Ingek-ingek tamakan upan nak, kononlah pulo tukang panciang dijujuik ikan, galak garundang mamandangi. Sopan-sopan dalam bagaua, pantangkan tasingik budi. Paliang cilako anak bujang lasak tangan, tadorong jambo, resek panja kumari awai. Alamai tak luluih di Ebtanas nak, dropout kasudahanyo. Picayolah waang.

Ado ciek nan mangamang mahantu-hantu dipikiran yaitu dek asik cubo kacubo ko eh, gilo dirintang hati gadang, ilang tujuan nan ushalli, ibarat urang mambali kudo ko anak. Baa urangmambali kudo? Dicubo nan Kararanggo, dipakaikan palano sirah, lalu dilacak ka galangang lari sabalik dua balik, lah panek kudo balapehkan. Dicakau Tangguli Anguih. Dipasangi paragaik bendi cacek tibo salah batimpo, tinggalah kudo jo nasibnyo. Disemba pulo nan bacak putiah dimuek baban dipungguang dihalau malajang bukik, hek indak hok pun indak maluncua sajo bajalan. Kasudahanyo lah marasai kudo sakandang kuku caia pungguang malaleh, bulu kusuik ikua lah regek ulah dek ciluah salah niat janji lah mukia jo baliak orong, sumpah bagumam baidokan. Usah tajadi tu anak oiiiii. Utanglah nyato tapabuek tu nak, hukum karama lah mananti anak cucu ang pambaia nyo, nauzubillah.
😦
Saketek nak. Taserak ka ayah piliah taicia ka dijapuiki, sawajah umua jo pangkeknyo ado bana rumus jo ukurannyo, salisiah umua nan ideal yaitu saparo ditambah tujuah aratinyo umua padusi nan sadang elok satanggah umua laki-laki ditambah bilangan tujuah, umpamo awak baumua 20 nan padusi handaklah 10+7, tapeknyo baumua 17. Baitupun kok marapulai baumua 26, anak daro musti saparo dari 26, 13+7, 20, umua 20 sadang elok atau kok kalabiah jan banyak bana kok kurang jan sampai jauah nak saimbang kabau jo padati. Tinggi badan pun dikaji pulo mangko sarasi bapasangan dak elok roman baiak dipandang jan tinggi padusi dari awak satidak-tidaknyo beda satampo ataupun samo saukuran. Nah itulah nak lah ayah surahkan caro-caronyo baa manilai urang padusi ko, cubo nalarkan jo pikiran. Satitiak jadikan kalauik kok sakapa tolong gunuangkan. Sado nan tun ilimu ayah.

Bersambung…….

Posting berikutnya: Pitaruah Ayah untuak Anak Laki-laki Volume 2 (After Wedding), kemungkinan sampai Volume 4, menyusul Pitaruah Ayah untuak Anak Padusi (alun jaleh banyak seri no) sudah tu Pitaruah Ayah untuak Calon Pangulu (banyak ilmu leadership disiko).

Tarimo kasih kapado Uncu (Allen Sutan Kedaung) , nan lah mambatuan nan salah, baiak itu salah ijo sarato salah danga.

@Tjikoen 💡

Advertisements

~ by dentjikoen on 27/09/2011.

One Response to “Pitaruah Ayah untuak Anak Laki-laki Volume 1 (Pre Wedding)”

  1. keren, booh 🙂 keren isi pasan jo bahaso nyo, ditunggu edisi Pitaruah Ayah untuak Anak Padusi 🙂

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: